Fieras d'alp (Älplerchilbi e Sennenchilbi)

En blers vitgs da la Svizra centrala che han ina tradiziun d'economia d'alp, han lieu festas da la racolta religiusas suenter la stgargiada d'alp. Quellas èn per las abitantas e per ils abitants dal vitg e per las famiglias da purs dals bains agriculs vischins in'occurrenza sociala impurtanta per ina scuntrada durant l'onn.

Il pli derasadas èn ellas sco «Älplerchilbi» (fiera da la pastriglia) en ils dus chantuns Sur- e Sutsilvania. Il connex local ch'è qua spezialmain ferm sa preschenta en ils versets da la pastriglia che vegnan recitads sin la plazza principala. Ils versets tractan oravant tut eveniments locals u fan beffa da persunas enconuschentas dal vitg. Cunzunt en la regiun enturn la Rigi èn sa furmadas il 20avel tschientaner variantas da la festa che mettan l'accent sin il cortegi e pia sin la (re-)preschentaziun da la vita d'alp e da las isanzas en general. Ellas vegnan numnadas qua «Sennenchilbi» ed attiran in public surregiunal cun fin a 30'000 aspectaturas ed aspectaturs. Il tratg cuminaivel da tut las fieras d'alp e da signuns da la Svizra centrala è quel ch'ellas vegnan realisadas da societads che derivan savens da confraternitads ch'èn plirs tschients onns veglias. La confraternitad da signuns la pli veglia è quella da Sviz. Ella è sa furmada l'onn 1575 ed ha er realisà sia emprima fiera ils 19 d'october dal medem onn.