La festa d'Unspunnen

La festa d'Unspunnen ad Interlaken è ina festa da costums e da pastriglia, concepida da las grondas uniuns d'usits da la Svizra, da la Federaziun svizra da costums, da l'Associaziun federala da lutga svizra, da l'Associaziun svizra da jodlar e da l'Associaziun svizra da la musica populara. Ensemen cun lur associaziuns affiliadas dal chantun Berna preschentan ellas il stuschar crappa, il lutgar, il sun da tibas, musica populara, sauts da costums, chanzuns da jodel e jodels natirals. Il cortegi l'avantmezdi da la dumengia da la festa è ina spezia da «parada da la cultura populara svizra».

Dapi l'onn 1946 ha lieu questa festa regularmain en in ritmus da circa mintga 12 onns. La tradiziun va però enavos al cumenzament dal 19avel tschientaner. Las emprimas duas festas d'Unspunnen èn vegnidas iniziadas ils onns 1805 e 1808 da quatter patrizians da la citad da Berna sco festa svizra da pastriglia per surmuntar las differenzas tranter citad e champagna en l'era da la Helvetica. Ultra da quai valan questas festas sco inizialisaziun per il turissem modern en la Surselva Bernaisa, per la reanimaziun da la tiba e per l'interess creschent vi da las chanzuns popularas. Fin oz ha la festa d'Unspunnen ina gronda attracziun ed ina impurtanza simbolica speziala. Betg l'ultim er perquai han ils separatists giurassians engulà l'onn 1984 or dal Museum da turissem ad Unterseen il crap d'Unspunnen che vegn duvrà per la disciplina dal stuschar crappa. L'onn 2001 è il crap original puspè vegnì chattà. L'onn 2005 è el però puspè vegnì engulà ed è restà sparì fin al di dad oz.