Tschaiver da Basilea*

*Integrada en la glista represchentativa dal patrimoni cultural immaterial da l'UNESCO

In turnier da chavaliers da l'onn 1376 è l'occurrenza da tschaiver a Basilea la pli veglia ch'è documentada. Dapi lura è il tschaiver da Basilea sa midà cuntinuadamain. En sia furma actuala han ils trais dis ils pli bels («drei scheenschte Dääg»), sco ch'il tschaiver vegn numnà a Basilea, ina gronda attracziun lunsch sur la citad or. Il glindesdi suenter mesemna da la tschendra sa rimnan las Basilaisas ed ils Basilais, las visitadras ed ils visitaders a las quatter la damaun. Sgarschaivel quiet èsi en la citad dal tuttafatg stgira avant ch'il maior dals tamburs dat il cumond da marschar «Morgenstreich vorwärts marsch» e ch'ils tamburs costumads ed ils piccolos cumenzan il tschaiver cun lur suns. Il glindesdi e la mesemna suentermezdi preschentan var 11'000 participantas e participants costumads numerus motivs en ils gronds cortegis. Il mardi tutga als uffants mascrads ed a las musicas da tschaiver. Ina rolla tut speziala al tschaiver da Basilea han las var 100 gruppas da salamuiras che reciteschan lur versets illustrads e plain beffas en las ustarias ed en ils tschalers.