Sechseläuten

Il terz glindesdi d'avrigl festiveschan las mastergnanzas da Turitg il «Sechseläuten» e passan vestgidas en costums istorics tras la citad. Sin la plazza dal «Sechseläuten» al Bellevue vegn ars a las 18.00 il «Böögg», in pop da naiv fatg or da taila e laina ed emplenì cun material explosiv. En il ritmus da la melodia dal marsch da «Sechseläuten» circumdeschan gruppas da chavaltgaders il stgandler, sin il qual è plazzada la figura invernala. Pli svelt ch'il «Böögg» perda ses chau e pli svelt che l'enviern è finì. Pli tard mangian ils commembers da las mastergnanzas e lur giasts ina tschaina en lur stivas tradiziunalas. Silsuenter visitan las mastergnanzas ina l'autra.

Il «Sechseläuten» è collià stretgamain cun las mastergnanzas fundadas il 14avel tschientaner. Il 19avel tschientaner han quellas bain pers lur impurtanza politica, ellas èn dentant sa mantegnidas sco uniuns da dretg privat. In emprim cortegi, però cun caracter da tschaiver, ha gì lieu l'onn 1837. Il 1867 è vegnì realisà per l'emprima giada il cortegi d'uffants che passa anc oz la dumengia avant il «Sechseläuten» tras la citad. Dapi l'onn 1893 organisescha il Comité central da las mastergnanzas turitgaisas il «Sechseläuten» e la brischada dal «Böögg». Oz stattan mintgamai a l’ur da la via millis d'aspectaturas e d'aspectaturs a per guardar il cortegi. Dapi intgins onns ha lieu ultra dal program uffizial ina grillada sur la burnida dal stgandler sin la plazza da «Sechseläuten».