Tir dals mats

Il tir dals mats turitgais ha lieu mintgamai la segunda fin d'emna dal settember u in'emna avant il di da la rogaziun federala e dura dal venderdi saira fin il glindesdi saira. L'occurrenza ha ses origin en la scolaziun militara dals mats ch'è attestada fin al temp medieval. Dapi il 17avel tschientaner vegnivan fatgs la stad exercizis da sajettar che vegnivan terminads il settember cun ina sort examen en furma dal tir dals mats («Knabenschiessen»). Dapi l'onn 1899 organisescha la Societad da tir da la citad da Turitg il tir dals mats al Albisgütli. L'onn 1991 èn per l'emprima giada vegnidas envidadas er mattas a la concurrenza da tir. Oz è circa in terz dals passa 4000 giuvenils en la vegliadetgna da 13 fin 17 onns mattas. Il campiun-tiradur resp. la campiunessa-tiradura vegn undrada il glindesdi en preschientscha da represchentants da la politica, dal militar, d'uniuns da tir e da mastergnanzas. Al proxim «Sechseläuten» è la campiunessa-tiradura u il campiun-tiradur il giast da la mastergnanza cun il num «Weggenzunft». A l'occurrenza fan er part musicas da giuvenils e var 300 gidantras e gidanters en uffizi d'onur.

La festa (dals giuvenils) vegn accumpagnada d'ina gronda fiera. Tenor las observaziuns dal comité festiv percepescha la populaziun probablamain en emprima lingia questa fiera e main la concurrenza da tir. Ultra da quai saja la fiera dal tir dals mats la pli gronda fiera da la Svizra che ha lieu sin ina plazza unica. Tranter 700'000 ed 1 milliun persunas visitan tut tenor l'aura la fiera durant ils trais dis dal tir dals mats.