Tribunas d'operettas da l'Argovia

Ina spezialitad dal chantun Argovia è la ferma tradiziun da chor e da teater. Cun il «Schützenhaustheater» a Baden è vegnì fundà l'onn 1675 l'emprim teater fix en Svizra. A partir dal 19avel tschientaner è sa sviluppada ina tradiziun d'operettas variada sin tribunas laicas ed en ils chors laics. Oz preschentan diversas tribunas laicas operettas sut ina direcziun professiunala: la Tribuna da Fricktal, l'Operetta da Möriken-Wildegg, la Tribuna d'operettas da Bremgarten e la Societad da teater da Beinwil, questa ultima en ina tradiziun nuninterrutta dapi l'onn 1864 en il «Löwensaal».

Mintga dus onns gioga mintgina da questas quatter tribunas d'operettas in toc nov. Las preparaziuns duran in onn e pretendan bler engaschament da las participantas e dals participants. Suenter in onn cun dus fin tschintg emprovas per emna stat il chor laic ensemen cun las solistas e cun ils solists durant trais fin tschintg mais quatter giadas per emna sin tribuna. L'applaus a la fin da mintga preschentaziun cumpensescha ils strapatschs e stimulescha las acturas ed ils acturs laics a prestaziuns maximalas. Il mund da las operettas cun lur costums fascinescha tuttas e tuts, uschia che la melanconia cumenza cun la derniera. Ensemen cun il public intgantà braman ellas ed els gia bainbaud il proxim project d'operetta.