Racoglier plantas selvadias

Gia avant 10'000 onns han il umans en il Vallais racolt plantas selvadias per las mangiar e per las duvrar sco medischina. Tschertas spezias da plantas èn vegnidas cultivadas gia avant 7500 onns. Sco funtauna indispensabla per il nutriment ed er sco part integrala impurtanta da la medischina è la racolta da plantas selvadias vegnida pratitgada gia dapi il temp preistoric da tut ils pievels da quest mund ed era fin a la mesadad dal 20avel tschientaner er ina part da la vita quotidiana d’ina gronda part da las famiglias vallesanas. Las plantas ramassadas u racoltas vegnivan appreziadas surtut pervi da lur valur nutritiva u pervi da lur effect curativ e cosmetic. Ellas èn er vegnidas duvradas sco cliniez e per intents artisanals u divertents.

La tradiziun da racoglier plantas mussa il stretg liom da l'uman cun la natira ed è cumprovada savens en la litteratura. Malgrà quai è sia existenza periclitada, perquai che mo paucas persunas dal sectur agricul, abitants da las regiuns alpinas, aderents da la medischina alternativa e spezialists (tranter quels en emprima lingia l'associaziun Valplantes) san anc avunda per cleger u per cultivar plantas selvadias. Il medem mument è creschida la dumonda da plantas selvadias, uschia che las plantas las pli appreziadas vegnan ozendi cultivadas. Quai porta als purs da muntogna in gudogn supplementar bainvesì. La racolta vegn fatga er oz anc per gronda part a maun, resguardond las leschas. In emprim decret davart la protecziun da plantas selvadias ha il cussegl guvernativ deliberà l'onn 1936 e la glista da las plantas raras vegn actualisada permanentamain.