Festa d'uffants da Son Gagl

La tradiziun da la festa d'uffants da Son Gagl ha cumenzà l'onn 1824 en connex cun la refurma da scola da la citad. Sias ragischs ha ella dentant en usits festivs anc pli vegls. Ozendi vegn questa festa normalmain celebrada mintga trais onns, n'è però betg suttamessa ad in termin fix. L'Uffizi da scola organisescha la festa e determinescha ordavant in motto, realisada vegn ella alura da las scolaras e dals scolars da la scola populara. Il di da festa dominescha questa occurrenza la vita privata e la vita professiunala en la citad: La festa d'uffants da Son Gagl è ina festa populara da tut la citad ch'ils uffants giaudan ensemen cun lur geniturs, cun lur tattas e tats e cun amias ed amis. Millis d'aspectaturas e d'aspectaturs flancheschan il cortegi dals uffants e dals represchentants da las autoritads sin ses curs tras la citad fin a la plazza da festa sin il Rosenberg. Là han lieu diversas represchentaziuns da las classas da scola ed in gentar.

Questa festa è sa midada en il decurs dals onns. Avant 100 onns steva la preschentaziun dals products da l'industria da surcusida da la citad en il center da la festa d'uffants. Las mattas e las dunnas giuvnas purtavan vestgids alvs retgamads. Pervia da la crisa economica suenter l'Emprima guerra mundiala e pervia da la midada da la mentalitad vers la fin dals onns 1960 èn las surcusidas svanidas quasi dal tuttafatg. Oz sa preschenta la festa en ina moda e maniera che correspunda a la generaziun odierna d'uffants e da giuvenils.