Viticultura a Schaffusa

Il chantun Schaffusa ha ina tradiziun da viticultura da blers tschientaners ed è – suenter il chantun Turitg – il chantun da vin il segund grond da la Svizra tudestga. En ventg vischnancas produceschan viticulturas e viticulturs oz vin sin ina surfatscha da circa 500 hectaras. La racolta d'ivas cuntanscha en media ina valur da 15 milliuns francs. Il chantun è sa posiziunà da nov sco regiun da vin dapi l'onn 2002 cun las viticulturas ed ils viticulturs, cun las producentas ed ils producents da vin sco er cun la federaziun mercantila «Schaffhauser Wein». Els han creà il label «Schaffusa, territori dal pinot noir».

Integrà en la cuntrada da collinas en il vest da la citad da Schaffusa sa chatta il Klettgau, il territori da viticultura il pli impurtant dal chantun Schaffusa. Ses terrens da chaltschina arschiglius, in clima miaivel, paucas precipitaziuns e bler sulegl porschan cundiziuns optimalas per cultivar l'iva dal pinot noir. Vitgs pittorescs, grondas vignas, chasettas dals viticulturs e torchels caracteriseschan anc oz l'apparientscha da questa cuntrada cultivada.

Colliadas cun la viticultura èn numerusas festas da vin. Tranter il cumenzament da settember ed il cumenzament d'october vegnan celebradas en las sis vischnancas da viticultura las pli grondas Hallau, Wilchingen-Osterfingen, Siblingen, Löhningen, Gächlingen e Trasadingen festas d'atun che attiran ensemen fin a 50 000 visitadras e visitaders. Las pli veglias e pli enconuschentas èn stadas las «Dumengias d'atun da Hallau», oz numnadas «Hallaugia». Lur origins èn da chattar en las fieras d'atun u festas da viticultura che han lieu dapi l'onn 1935.