Köhlern – Far charvun en l'Entlebuch

Laschar brasclar lain en ina charvunera: uschia fan ins charvun da lain. A Romoos, ina vischnanca rurala en l'Entlebuch lucernais, pratitgeschan ils ultims charvuners da la Svizra quest vegl mastergn sin basa professiunala sco gudogn accessoric. Far charvun ha ina tradiziun da blers tschientaners en il territori dal Napf. Perquai ch'ils guauds èn stads nunaccessibels durant in lung temp, n'han ins betg pudì nizzegiar la laina radunda ed uschia han ins cumenzà a producir charvun da lain. Mo en la vischnanca da Romoos èn cumprovadas passa 200 plazzas istoricas, nua ch'i vegniva fatg charvun. La pli blera lavur dovri per fabritgar e per preparar ina charvunera sut tschiel avert. Ina tala vegn fatga cun plunar laina da rument ad in mantun da circa quatter meters autezza e diesch meters ladezza. Suenter ch'ella è vegnida envidada, brascla la charvunera durant circa duas emnas d’in cuntin, survegliada permanentamain dal charvuner. La finala vegn il charvun tratg viadora cun blera forza e cun bler suaditsch. Uschia produceschan ils charvuners da Romoos circa 100 tonnas charvun per onn. Fin ils onns 1980 cumprava l'industria d'atschal lur product. Suenter che quests cumpraders èn sa retratgs, èn ils charvuners sa spezialisads sin il martgà da charvun per brassar liongias.