Cursa gigantesca da punteras

Sin in traject da var 12 kilometers tranter Degenau e Kradolf sin la Sitter e sin la Thur sa mesiran – la dumengia dal di da la mamma – punteras en trais categorias. Entant che las punteras da la categoria da cursa remblan uschè svelt sco pussaivel da l'aua giu, giaudan las flottadras ed ils flottaders da la classa d'originalitad l'interacziun cun il public. Lur construcziuns cumplexas che tractan in tema da libra tscherna vegnan fabritgadas durant fin milli uras da lavur e pon vegnir contempladas la saira avant la cursa sco er il di da cursa avant la partenza. En la terza gruppa partan las punteras da la categoria da divertiment che na vegnan valitadas ni tenor la sveltezza ni tenor l'aspect. L'occurrenza è zunt appreziada en la regiun. Da bell'aura attira il spectacul d'aua fin 30'000 aspectaturas ed aspectaturs. Lieus d'observaziun spezialmain frequentads èn las trais serras sin il traject. Per las punteras èsi ina difficultad particulara da surmuntar quellas, uschia che la tensiun è gronda. Organisada vegn la cursa gigantesca da punteras da l'uniun Flossrennen, cun il sustegn da nundumbraivlas gidantras e gidanters voluntars.