No e Wili (gieu sut tschiel avert)

Il gieu sut tschiel avert «No e Wili» tutga tar las occurrenzas las pli tradiziunalas da la scena svizra da gieus al liber. Dapi l'onn 1924 vegn preschentà il gieu sut tschiel avert en intervals irregulars. Tut en tut passa 123'000 aspectaturas ed aspectaturs han visità las otg inscenaziuns d'enfin ussa. Suenter l'onn 1924 han quellas gì lieu ils onns 1930, 1957, 1986, 1991, 1998, 2007 e 2016. Fin 300 acturas ed acturs laics e passa 100 gidantras e gidanters da la regiun laschan reviver il temp medieval en moda impressiunanta davant la culissa singulara dal Rathausplatz da Stein am Rhein.

Giugada vegn ina ditga captivanta che sa basa sin l'istorgia tradiziunala dal 15. tschientaner da Stein am Rhein. Il gieu al liber era vegnì scrit da l'archivar da la citad da Stein am Rhein Heinrich Waldvogel (1891–1981). El ha adaptà l'onn 1924 la ditga «No e Wili» ad in gieu dramatic en quatter acts. «No e Wili» vul dir «anc in mument pazienza». Cun quest clom duai in pasterner avair gudagnà temp l'onn 1478 per ils da Stein am Rhein, ch'eran fidaivels attaschads dals confederads, per sa dustar cun success cunter in'attatga habsburgaisa, incitada da lur burgamester traditur Hans Laitzer. Dapi il november 1981 è responsabla in'uniun per la realisaziun periodica dal gieu al liber. L'ultima producziun da l'onn 2016 ha gì lieu en il rom da las festivads medievalas dal giubileum «600 onns Concil da Constanza».