Solennitad da Murten

Sco en blers lieus vegnan celebradas er a Murten la fin da l’onn scolar e l’entschatta da las vacanzas da stad cun ina festa per la giuventetgna. Questa festa da scola che porta il num «Solennité» (er scursanì en «Sola») ha la spezialitad dad esser colliada cun la commemoraziun da la bataglia da Murten dals 22 da zercladur 1476. La Sollenité è ina festa impurtanta da la citad da Murten ed è perquai vegnida declerada sco firà. Las autoritads communalas surprenda las spaisas, las scolas s’occupan da preparar l’eveniment e la magistraglia è responsabla per l’andament da la festa. Bleras persunas da la populaziun locala èn participadas a las preparativas, tranter auter decorond cun tgira e creativitad ils bigls da la citad veglia. L’organisaziun vegn garantida per gronda part da las partiziuns tudestga e franzosa da las scolas primaras e secundaras che han en total var 200 scolaras e scolars (2017).

Er en bleras autras vischnancas e citads vegnan organisadas festas da promoziun e da giuventetgna che han tuttas lur particularitads localas. A Burgdorf vegn la Solennité numnada «Solätte» e vegn celebrada dapi il 1729.